“Эдийн засгийн коридорт чөлөөт бүс холбогдох нь” сэдэвт хөрөнгө оруулагчдын форум МҮХАҮТ-ын их танхимд 2020 оны 01 дүгээр сарын 16-ны өдөр зохион байгуулагдлаа. Форумд урилгаар Монгол Улсын Шадар сайд Ө.Энхтүвшин оролцсон бөгөөд “Дэлхийн аль ч улсад чөлөөт бүсэд шаардлагатай дэд бүтцийг төр бүрдүүлж, бизнес эрхлэгчид аж ахуйн нэгжүүд үйл ажиллагаагаа эрхэлж ашиг олж, тэр хэмжээгээрээ улсынхаа эдийн засагт зохих хувь нэмэрээ оруулах нь бизнесийн салбарын үүрэг байдаг. Монгол Улс чөлөөт бүсийг хөгжлийн гарц болгохын тулд бидэнд зоримог шийдвэр бодит хэрэгжилт хэрэгтэй” хэмээн онцлов.
Тус форумд хөрөнгө оруулагч аж ахуй нэгжүүд, бизнес эрхлэгчид, Зам тээврийн яам, Гадаад харилцааны яам, Хил хамгаалах ерөнхий газар, Гаалийн ерөнхий газар, Гадаадын иргэн харьяатын газар, Мэргэжлийн хяналтын Ерөнхий газар, Азийн хөгжлийн банк, “Замын-Үүд”, “Алтанбулаг”, ”Цагааннуур“ чөлөөт бүсүүдийн Захирагчийн Ажлын албаны нийт 300 гаруй төлөөлөл оролцож, эдийн засгийн коридортой чөлөөт бүсийг уялдуулах арга зам, чөлөөт бүсүүдийн өмнө тулгарч буй асуудлуудыг хэлэлцэж, боломжийг тодорхойлон шийдвэр гаргачдын түвшинд хүргэх талаар нээлттэй хэлэлцсэн юм.
Үйл ажиллагааны төгсгөлд тус форумаас гарсан санал дүгнэлт, зөвлөмжийг танилцуулж бизнес эрхлэгчдийн дуу хоолой, хүсэл шаардлагыг Засгийн газар, УИХ-д хүргүүлэхээр болж, үүнийгээ тууштай ажил хэрэг болгоно хэмээн дурьдлаа.
“ЗАМЫН-ҮҮД” ЧӨЛӨӨТ БҮСИЙН ЗАХИРАГЧИЙН АЖЛЫН АЛБА
